అమ్బాపఞ్చరత్నస్తోత్రమ్ - Amba Pancharatna Stotram

 అమ్బాశమ్బరవైరితాతభగినీ శ్రీచన్ద్రబిమ్బాననా

బిమ్బోష్ఠీ స్మితభాషిణీ శుభకరీ కాదమ్బవాట్యాశ్రితా । 

హ్రీఙ్కారాక్షరమన్త్రమధ్యసుభగా శ్రోణీనితమ్బాఙ్కితా

మామమ్బాపురవాసినీ భగవతీ హేరమ్బమాతావతు  ॥ 1 ॥

కల్యాణీ కమనీయసున్దరవపుః కాత్యాయనీ కాలికా

కాలా శ్యామలమేచకద్యుతిమతీ కాదిత్రిపఞ్చాక్షరీ ।

కామాక్షీ కరుణానిధిః కలిమలారణ్యాతిదావానలా

మామమ్బాపురవాసినీ భగవతీ హేరమ్బమాతావతు  ॥ 2 ॥

కాఞ్చీకఙ్కణహారకుణ్డలవతీ కోటీకిరీటాన్వితా

కన్దర్పద్యుతికోటికోటిసదనా పీయూషకుమ్భస్తనా ।

కౌసుమ్భారుణకాఞ్చనామ్బరవృతా కైలాసవాసప్రియా

మామమ్బాపురవాసినీ భగవతీ హేరమ్బమాతావతు  ॥ 3 ॥

యా సా శుమ్భనిశుమ్భదైత్యశమనీ  యా రక్తబీజాశనీ

యా శ్రీ విష్ణుసరోజనేత్రభవనా యా బ్రహ్మవిద్యాఽఽసనీ । 

యా దేవీ మధుకైటభాసురరిపుర్యా మాహిషధ్వంసినీ

మామమ్బాపురవాసినీ భగవతీ హేరమ్బమాతావతు  ॥ 4 ॥

శ్రీవిద్యా పరదేవతాఽఽదిజననీ దుర్గా జయా చణ్డికా

బాలా శ్రీత్రిపురేశ్వరీ శివసతీ శ్రీరాజరాజేశ్వరీ । 

శ్రీరాజ్ఞీ శివదూతికా శ్రుతినుతా శృఙ్గారచూడామణిః

మామమ్బాపురవాసినీ భగవతీ హేరమ్బమాతావతు  ॥ 5 ॥

అమ్బాపఞ్చకమద్భుతం పఠతి చేద్యో వా ప్రభాతేఽనిశం

దివ్యైశ్వర్యశతాయురుత్తమమిదం విద్యాం శ్రియం శాశ్వతమ్ ।

లబ్ధ్వా భూమితలే స్వధర్మనిరతాం శ్రీసున్దరీం భామినీం

అన్తే స్వర్గఫలం లభేత్స విబుధైః సంస్తూయమానో నరః  ॥ 6 ॥

॥ ఇతి అమ్బాపఞ్చరత్నస్తోత్రం సమాప్తమ్ ॥

శ్రీవిష్ణుషట్పదీ- Srivishnu Shatpadi Stotram

అవినయమపనయ విష్ణో దమయ మనః శమయ విషయమృగతృష్ణామ్ ।

భూతదయాం విస్తారయ తారయ సంసారసాగరతః ॥ 1॥

దివ్యధునీమకరన్దే పరిమలపరిభోగసచ్చిదానన్దే ।

శ్రీపతిపదారవిన్దే భవభయఖేదచ్ఛిదే వన్దే ॥ 2॥

సత్యపి భేదాపగమే నాథ తవాహం న మామకీనస్త్వమ్ ।

సాముద్రో హి తరఙ్గః క్వచన సముద్రో న తారఙ్గః ॥ 3॥

ఉద్ధృతనగ నగభిదనుజ దనుజకులామిత్ర మిత్రశశిదృష్టే ।

దృష్టే భవతి ప్రభవతి న భవతి కిం భవతిరస్కారః ॥ 4॥

మత్స్యాదిభిరవతారైరవతారవతాఽవతా సదా వసుధామ్ ।

పరమేశ్వర పరిపాల్యో భవతా భవతాపభీతోఽహమ్ ॥ 5॥

దామోదర గుణమన్దిర సున్దరవదనారవిన్ద గోవిన్ద ।

భవజలధిమథనమన్దర పరమం దరమపనయ త్వం మే॥ 6॥

నారాయణ కరుణామయ శరణం కరవాణి తావకౌ చరణౌ ।

ఇతి షట్పదీ మదీయే వదనసరోజే సదా వసతు ॥ 7॥

॥ ఇతి శ్రీమద్ శఙ్కరాచార్యవిరచితం విష్ణుషట్పదీస్తోత్రం సమ్పూర్ణమ్ ॥

సర్వ దేవతావందనమ్

శ్రీమన్మహాగణాధిపతయే నమః ।

శ్రీ సరస్వత్యై నమః । శ్రీగురవే నమః ।

శ్రీమాతాపితృభ్యాం నమః ।

శ్రీలక్ష్మీనారాయణాభ్యాం నమః ।

శ్రీఉమామహేశ్వరాభ్యాం నమః ।

ఇష్టదేవతాభ్యో నమః । కులదేవతాభ్యో నమః ।

స్థానదేవతాభ్యో నమః । వాస్తుదేవతాభ్యాం నమః ।

సర్వేభ్యో దేవేభ్యో నమో నమః ।

లోకాః సమస్తాః సుఖినోభవంతు ।

సమస్త సన్మంగళాని భవంతు ॥

॥ ఓం శాంతిః శాంతిః శాంతిః ॥

॥ ఇతి సర్వ దేవతావందనమ్ ॥ 

అహల్యా ద్రౌపదీ సీతా తారా మండోదరీ తథా ।

పంచకన్యా స్మరేన్నిత్యం మహాపాతకనాశనమ్ ॥

హయగ్రీవ హయగ్రీవ హయగ్రీవేతి వాదినమ్ ।

నరం ముంచన్తి పాపాని దరిద్రమివ యోషితః ॥

హయగ్రీవ హయగ్రీవ హయగ్రీవేతి యో వదేత్ ।

తస్య నిస్సరతే వాణీ జహ్నుకన్యా ప్రవాహవత్ ॥

హయగ్రీవ హయగ్రీవ హయగ్రీవేతి యో ధ్వనిః ।

విశోభతే స వైకుణ్ఠ కవాటోద్ఘాటనక్షమః ॥

శ్రీలలితా పంచరత్న స్తోత్రం - Sri Lalitha Pancharatna Stotram

 ప్రాతః స్మరామి లలితా వదనారవిందం 

బింబాధరం పృధుల మౌక్తిక శోభినాసమ్

ఆకర్ణ దీర్ఘ నయనం మణికుండలాఢ్యం 

మందస్మితం మృగమదోజ్జ్వల ఫాలదేశమ్ || 1 ||

ప్రాతర్భజామి లలితా భుజకల్పవల్లీం 

రత్నాంగుళీయ లసదంగుళి పల్లవాఢ్యామ్

మాణిక్యహేమ వలయాంగద శోభమానాం 

పుండ్రేక్షు చాపకుసుమేషు సృణీర్దధానామ్ || 2 ||

ప్రాతర్నమామి లలితా చరణారవిందం 

భక్తేష్టదాన నిరతం భవసింధుపోతమ్

పద్మాసనాది సురనాయక పూజనీయం 

పద్మాంకుశ ధ్వజ సుదర్శన లాంఛనాఢ్యమ్ || 3 ||

ప్రాతః స్తువే పరశివాంలలితాం భవానీం 

త్రయ్యంతవేద్య విభవాం కరుణానవద్యామ్

విశ్వస్య సృష్టి విలయస్థితి హేతుభూతాం 

విశ్వేశ్వరీం నిగమ వాంగ్మనసాతిదూరామ్ || 4 ||

ప్రాతర్వదామి లలితే తవ పుణ్యనామ 

కామేశ్వరీతి కమలేతి మహేశ్వరీతి

శ్రీశాంభవీతి జగతాం జననీ పరేతి 

వాగ్దేవతేతి వచసా త్రిపురేశ్వరీతి || 5 ||

యః శ్లోక పంచక మిదం లలితాంబికాయాః 

సౌభాగ్యదం సులలితం పఠతి ప్రభాతే

తస్మై దదాతి లలితా ఝడితిప్రసన్నా 

విద్యాంశ్రియం విమలసౌఖ్య మనన్తకీర్తిమ్ ||

॥ ఇతి శ్రీమత్ శంకర భగవతః కృతౌ లలితా పంచకం సంపూర్ణమ్ ॥

శివ ప్రాతః స్మరణ స్తోత్రం - Shiva Pratah Smarana Stotram

ప్రాతః స్మరామి భవభీతిహరం సురేశం

గంగాధరం వృషభవాహనమంబికేశమ్ । 

ఖట్వాఙ్గ శూల వరదాభయ హస్తమీశం

సంసార రోగహర మౌషధ మద్వితీయమ్ ॥ 1॥

ప్రాతర్నమామి గిరిశం గిరిజార్ధదేహం

సర్గస్థితిప్రలయకారణమాదిదేవమ్ ।

విశ్వేశ్వరం విజితవిశ్వమనోఽభిరామం

సంసార రోగహర మౌషధ మద్వితీయమ్ ॥ 2॥

ప్రాతర్భజామి శివమేకమనన్తమాద్యం

వేదాన్తవేద్యమనఘం పురుషం మహాన్తమ్ ।

నామాదిభేదరహితం షడభావశూన్యం

సంసార రోగహర మౌషధ మద్వితీయమ్ ॥ 3॥

ప్రాతః సముత్థాయ శివం విచిన్త్య 

శ్లోకాంస్త్రయం యేఽనుదినం పఠన్తి ।

తే దుఃఖజాతం బహుజన్మ సంచితం 

హిత్వా పదం యాన్తి తదేవ శమ్భోః ॥ 4॥

॥ ఇతి శివ ప్రాతః స్మరణ స్తోత్రం॥

శ్రీగణేశ ప్రాతః స్మరణమ్ - Sri Ganesha Pratah Smarana Stotram

ప్రాతః స్మరామి గణనాథమనాథబన్ధుం

సిన్దూరపూరపరిశోభితగణ్డయుగ్మమ్ ।

ఉద్దణ్డవిఘ్నపరిఖణ్డనచణ్డదణ్డమ్ 

 ఆఖణ్డలాదిసురనాయకవృన్దవన్ద్యమ్ ॥ 1॥

ప్రాతర్నమామి చతురాననవన్ద్యమానమ్ 

 ఇచ్ఛానుకూలమఖిలం చ వరం దదానమ్ ।

తం తున్దిలం ద్విరసనాధిపయజ్ఞసూత్రం

పుత్రం విలాసచతురం శివయోః శివాయ ॥ 2॥

ప్రాతర్భజామ్యభయదం ఖలు భక్తశోక 

దావానలం గణవిభుం వరకుంజరాస్యమ్ ।

అజ్ఞానకాననవినాశనహవ్యవాహం 

ఉత్సాహవర్ధనమహం సుతమీశ్వరస్య ॥ 3॥

శ్లోకత్రయమిదం పుణ్యం సదా సామ్రాజ్యదాయకమ్ ।

ప్రాతరుత్థాయ సతతం యః పఠేత్ప్రయతః పుమాన్ ॥ 4॥

॥ ఇతి శ్రీగణేశ ప్రాతః స్మరణమ్ ॥ 

శ్రీవిష్ణోః ప్రాతః స్మరణమ్ - Vishnu Pratah Smarana Stotram

ప్రాతః స్మరామి భవభీతిమహార్తిశాన్త్యై

నారాయణం గరుడవాహనమబ్జనాభమ్ ।

గ్రాహాభిభూతవరవారణముక్తిహేతుం

చక్రాయుధం తరుణవారిజపత్రనేత్రమ్ ॥ 1॥

ప్రాతర్నమామి మనసా వచసా చ మూర్ధ్నా

పాదారవిన్దయుగలం పరమస్య పుంసః ।

నారాయణస్య నరకార్ణవతారణస్య

పారాయణప్రవణవిప్రపరాయణస్య ॥ 2॥

ప్రాతర్భజామి భజతామభయంకరం తం

ప్రాక్సర్వజన్మకృతపాపభయాపహత్యై ।

యో గ్రాహవక్త్రపతితాంఘ్రి గజేంద్ర ఘోర- 

శోకప్రణాశనకరో ధృతశంఖ చక్రః ॥ 3॥

శ్లోకత్రయమిదం పుణ్యం ప్రాతః ప్రాతః పఠేత్తుయః ।

లోకత్రయగురుస్తస్మై దద్యాదాత్మపదం హరిః ॥ 4॥

॥ ఇతి శ్రీవిష్ణోః ప్రాతఃస్మరణమ్ ॥

పరబ్రహ్మ ప్రాతః స్మరణ స్తోత్రమ్ - Parabrahma Pratah Smarana Stotram

 ప్రాతః స్మరామి హృది సంస్ఫురత్ ఆత్మతత్త్వం

సత్ చిత్ సుఖం పరమహంసగతిం తురీయమ్ ।

యత్ స్వప్న జాగర సుషుప్తమవైతి నిత్యం

తద్బ్రహ్మ నిష్కలమహం న చ భూతసంఘః ॥ 1॥

 

ప్రాతర్భజామి మనసా వచసామగమ్యం

వాచో విభాన్తి నిఖిలా యదనుగ్రహేణ । 

యన్నేతినేతివచనైర్నిగమా అవోచం

తం దేవదేవమజమచ్యుతం ఆహురగ్య్రమ్ ॥ 2॥ 

ప్రాతర్నమామి తమసః పరమర్కవర్ణం

పూర్ణం సనాతనపదం పురుషోత్తమాఖ్యమ్ ।

యస్మిన్నిదం జగదశేషమశేషమూర్తౌ

రజ్జ్వాం భుజంగమ ఇవ ప్రతిభాసితం వై ॥ ౩॥

శ్లోకత్రయమిదం పుణ్యం లోకత్రయవిభూషణమ్ ।

ప్రాతః కాలే పఠేద్యస్తు స గచ్ఛేత్ పరమం పదమ్ ॥ 4॥

॥ ఇతి శ్రీ ఆదిశంకరాచార్య విరచిత పరబ్రహ్మ ప్రాతః స్మరణ స్తోత్రమ్ సంపూర్ణం॥

సాధనా పంచకం - Sadhana Panchakam

 అద్వైతపఙ్చరత్నమ్ చ

వేదో నిత్యమధీయతాం తదుదితం కర్మ స్వనుష్ఠీయతాం

తేనేశస్య విధీయతామపచితిః కామ్యే మతిస్త్యజ్యతామ్ ।

పాపౌఘః పరిధూయతాం భవసుఖే దోషోఽనుసన్ధీయతాం

 ఆత్మేచ్ఛా వ్యవసీయతాం నిజగృహాత్తూర్ణం వినిర్గమ్యతామ్ ॥ 1॥

సంగః సత్సు విధీయతాం భగవతో భక్తిర్దృఢాఽఽధీయతాం

శాన్త్యాదిః పరిచీయతాం దృఢతరం కర్మాశు సన్త్యజ్యతామ్ ।

సద్విద్వానుపసృప్యతాం ప్రతిదినం తత్పాదుకా సేవ్యతాం

బ్రహ్మైకాక్షరమర్థ్యతాం శ్రుతిశిరోవాక్యం సమాకర్ణ్యతామ్ ॥ 2॥

వాక్యార్థశ్చ విచార్యతాం శ్రుతిశిరఃపక్షః సమాశ్రీయతాం

దుస్తర్కాత్సువిరమ్యతాం శ్రుతిమతస్తర్కోఽనుసన్ధీయతామ్ ।

బ్రహ్మాస్మీతి విభావ్యతామహరహర్గర్వః పరిత్యజ్యతాం

దేహేఽహమ్మతిరుజ్ఝ్యతాం బుధజనైర్వాదః పరిత్యజ్యతామ్ ॥ 3॥

క్షుద్వ్యాధిశ్చ చికిత్స్యతాం ప్రతిదినం భిక్షౌషధం భుజ్యతాం

స్వాద్వన్నం న తు యాచ్యతాం విధివశాత్ ప్రాప్తేన సన్తుష్యతామ్ ।

శీతోష్ణాది విషహ్యతాం న తు వృథా వాక్యం సముచ్చార్యతాం

ఔదాసీన్యమభీప్స్యతాం జనకృపానైష్ఠుర్యముత్సృజ్యతామ్ ॥ 4 ॥

ఏకాన్తే సుఖమాస్యతాం పరతరే చేతః సమాధీయతాం

పూర్ణాత్మా సుసమీక్ష్యతాం జగదిదం తద్బాధితం దృశ్యతామ్ ।

ప్రాక్కర్మ ప్రవిలాప్యతాం చితిబలాన్నాప్యుత్తరైః శ్లిష్యతాం

ప్రారబ్ధం త్విహ భుజ్యతామథ పరబ్రహ్మాత్మనా స్థీయతామ్ ॥ 5॥

॥ ఇతి పరమహంస పరివ్రాజకాచార్య శ్రీమచ్ఛఙ్కరాచార్య విరచిత సాధన పఞ్చకం సమ్పూర్ణమ్ ॥

శంకర-భగవత్పాదాచార్య-స్తుతిః

 ముదా కరేణ పుస్తకం దధానమీశరూపిణం

తథాఽపరేణ ముద్రికాం నమత్తమోవినాశినీం |

కుసుంభవాససావృతం విభూతిభాసిఫాలకం

నతాఽఘనాశనే రతం నమామి శంకరం గురుం || 1 ||

పరాశరాత్మజప్రియం పవిత్రితక్షమాతలం

పురాణసారవేదినం సనందనాదిసేవితం |

ప్రసన్నవక్త్రపంకజం ప్రపన్నలోకరక్షకం

ప్రకాశితాద్వితీయతత్త్వమాశ్రయామి దేశికం || 2 ||

సుధాంశుశేఖరార్చకం సుధీంద్రసేవ్యపాదుకం

సుతాదిమోహనాశకం సుశాంతిదాంతిదాయకం |

సమస్తవేదపారగం సహస్రసూర్యభాసురం

సమాహితాఖిలేంద్రియం సదా భజామి శంకరం || 3 ||

యమీంద్రచక్రవర్తినం యమాదియోగవేదినం

యథార్థతత్త్వబోధకం యమాంతకాత్మజార్చకం |

యమేవ ముక్తికాంక్షయా సమాశ్రయంతి సజ్జనాః

నమామ్యహం సదా గురుం తమేవ శంకరాభిధం || 4 ॥

స్వబాల్య ఏవ నిర్భరం య ఆత్మనో దయాలుతాం

దరిద్రవిప్రమందిరే సువర్ణవృష్టిమానయన్ |

ప్రదర్శ్య విస్మయాంబుధౌ న్యమజ్జయత్ సమాంజనాన్

స ఏవ శంకరస్సదా జగద్గురుర్గతిర్మమ || 5 ||

యదీయపుణ్యజన్మనా ప్రసిద్ధిమాప కాలటీ

యదీయశిష్యతాం వ్రజన్ స తోటకోఽపి పప్రథే |

య ఏవ సర్వదేహినాం విముక్తిమార్గదర్శకః

నరాకృతిం సదాశివం తమాశ్రయామి సద్గురుం || 6 ॥

సనాతనస్య వర్త్మనః సదైవ పాలనాయ యః

చతుర్దిశాసు సన్మఠాన్ చకార లోకవిశ్రుతాన్ |

విభాండకాత్మజాశ్రమాదిసుస్థలేషు పావనాన్

తమేవ లోకశంకరం నమామి శంకరం గురుం || 7 ||

యదీయహస్తవారిజాతసుప్రతిష్ఠితా సతీ

ప్రసిద్ధశృంగభూధరే సదా ప్రశాంతిభాసురే |

స్వభక్తపాలనవ్రతా విరాజతే హి శారదా

స శంకరః కృపానిధిః కరోతు మామనేనసం || 8 ॥

ఇమం స్తవం జగద్గురోర్గుణానువర్ణనాత్మకం

సమాదరేణ యః పఠేదనన్యభక్తిసంయుతః |

సమాప్నుయాత్ సమీహితం మనోరథం నరోఽచిరాత్

దయానిధేస్స శంకరస్య సద్గురోః ప్రసాదతః || 9॥

కనకధారాస్తోత్రం

వందే వన్దారుమన్దారమిన్దిరానన్దకన్దలమ్ ।

అమన్దానన్దసన్దోహబన్ధురం సిన్ధురాననమ్ ॥

అంగం హరేః పులకభూషణమాశ్రయంతీ

భృంగాంగనేవ ముకులాభరణం తమాలం |

అంగీకృతాఖిలవిభూతిరపాంగలీలా

మాంగల్యదాఽస్తు మమ మంగలదేవతాయాః || 1 ||

ముగ్ధా ముహుర్విదధతీ వదనే మురారేః

ప్రేమత్రపాప్రణిహితాని గతాగతాని |

మాలా దృశోర్మధుకరీవ మహోత్పలే యా

సా మే శ్రియం దిశతు సాగరసంభవాయాః || 2 ||

విశ్వామరేంద్రపదవిభ్రమదానదక్షం

ఆనందహేతురధికం మురవిద్విషోఽపి |

ఈషన్నిషీదతు మయి క్షణమీక్షణార్ధ-

మిందీవరోదరసహోదరమిందిరాయాః || 3 ||

ఆమీలితాక్షమధిగమ్య ముదా ముకుందం

ఆనందకందమనిమేషమనంగతంత్రం |

ఆకేకరస్థితకనీనికపక్ష్మనేత్రం

భూత్యై భవేన్మమ భుజంగశయాంగనాయాః || 4 ||

బాహ్వంతరే మధుజితః శ్రితకౌస్తుభే యా

హారావలీవ హరినీలమయీ విభాతి |

కామప్రదా భగవతోఽపి కటాక్షమాలా

కల్యాణమావహతు మే కమలాలయాయాః || 5 ||

కాలాంబుదాలిలలితోరసి కైటభారేః

ధారాధరే స్ఫురతి యా తటిదంగనేవ |

మాతుః సమస్తజగతాం మహనీయమూర్తిః

భద్రాణి మే దిశతు భార్గవనందనాయాః || 6 ||

ప్రాప్తం పదం ప్రథమతః ఖలు యత్ప్రభావాత్

మాంగల్యభాజి మధుమాథిని మన్మథేన |

మయ్యాపతేత్తదిహ మంథరమీక్షణార్ధం

మందాలసం చ మకరాలయకన్యకాయాః || 7 ||

దద్యాద్దయానుపవనో ద్రవిణాంబుధారాం

అస్మిన్నకించనవిహంగశిశౌ విషణ్ణే |

దుష్కర్మఘర్మమపనీయ చిరాయ దూరం

నారాయణప్రణయినీనయనాంబువాహః || 8 ||

ఇష్టావిశిష్టమతయోఽపి యయా దయార్ద్ర-

దృష్ట్యా త్రివిష్టపపదం సులభం లభంతే |

దృష్టిః ప్రహృష్టకమలోదరదీప్తిరిష్టాం

పుష్టిం కృషీష్ట మమ పుష్కరవిష్టరాయాః || 9 ||

గీర్దేవతేతి గరుడధ్వజసుందరీతి

శాకంభరీతి శశిశేఖరవల్లభేతి |

సృష్టిస్థితిప్రలయకేలిషు సంస్థితాయై

తస్యై నమస్త్రిభువనైకగురోస్తరుణ్యై || 10 ||

శ్రుత్యై నమోఽస్తు శుభకర్మఫలప్రసూత్యై

రత్యై నమోఽస్తు రమణీయగుణార్ణవాయై |

శక్త్యై నమోఽస్తు శతపత్రనికేతనాయై

పుష్ట్యై నమోఽస్తు పురుషోత్తమవల్లభాయై || 11 ||

నమోఽస్తు నాలీకనిభాననాయై

నమోఽస్తు దుగ్ధోదధిజన్మభూమ్యై |

నమోఽస్తు సోమామృతసోదరాయై

నమోఽస్తు నారాయణవల్లభాయై || 12 ||

సంపత్కరాణి సకలేంద్రియనందనాని

సామ్రాజ్యదానవిభవాని సరోరుహాక్షి |

త్వద్వందనాని దురితాహరణోద్యతాని

మామేవ మాతరనిశం కలయంతు మాన్యే || 13 ||

యత్కటాక్షసముపాసనావిధిః

సేవకస్య సకలార్థసంపదః |

సంతనోతి వచనాంగమానసైః   

త్వాం మురారిహృదయేశ్వరీం భజే || 14 ||

సరసిజనిలయే సరోజహస్తే

ధవలతమాంశుకగంధమాల్యశోభే |

భగవతి హరివల్లభే మనోజ్ఞే

త్రిభువనభూతికరి ప్రసీద మహ్యం || 15 ||

దిగ్ హస్తిభిః కనకకుంభముఖావసృష్ట-

స్వర్వాహినీవిమలచారుజలప్లుతాంగీం |

ప్రాతర్నమామి జగతాం జననీమశేష-

లోకాధినాథగృహిణీమమృతాబ్ధి పుత్రీం || 16 ||

కమలే కమలాక్షవల్లభే త్వం

కరుణాపూరతరంగితైరపాంగైః |

అవలోకయ మామకించనానాం

ప్రథమం పాత్రమకృత్రిమం దయాయాః || 17 ||

స్తువంతి యే స్తుతిభిరమూభిరన్వహం

త్రయీమయీం త్రిభువనమాతరం రమాం |

గుణాధికా గురుతరభాగ్యభాజినో

భవంతి తే భువి బుధభావితాశయాః || 18 ||

నమోఽస్తుహేమామ్బుజపీఠికాయై

నమోఽస్తుభూమణ్డలనాయికాయై ।

నమోఽస్తుదేవాదిదయాపరాయై

నమోఽస్తుశార్ఙ్గాయుధవల్లభాయై ॥ 19॥

నమోఽస్తుదేవ్యై భృగునన్దనాయై

నమోఽస్తువిష్ణోరురసిస్థితాయై ।

నమోఽస్తులక్ష్మ్యై కమలాలయాయై

నమోఽస్తుదామోదరవల్లభాయై ॥ 20॥

నమోఽస్తుకాన్త్యై కమలేక్షణాయై

నమోఽస్తుభూత్యై భువనప్రసూత్యై ।

నమోఽస్తుదేవాదిభిరర్చితాయై

నమోఽస్తునన్దాత్మజవల్లభాయై ॥ 21॥

దేవి ప్రసీద జగదీశ్వరి లోకమాతః

కల్యాణగాత్రి కమలేక్షణజీవనాథే ।

దారిద్ర్యభీతిహృదయం శరణాగతం మామ్

ఆలోకయ ప్రతిదినం సదయైరపాఙ్గైః ॥ 22॥

|| కనకధారాస్తోత్రం సంపూర్ణం ||

కల్యాణ-వృష్టిస్తవః

 కల్యాణవృష్టిభిరివామృతపూరితాభి-

ర్లక్ష్మీస్వయంవరణమంగలదీపికాభిః |

సేవాభిరంబ తవ పాదసరోజమూలే

నాకారి కిం మనసి భాగ్యవతాం జనానాం || 1 ||

ఏతావదేవ జనని స్పృహణీయమాస్తే

త్వద్వందనేషు సలిలస్థగితే చ నేత్రే |

సాన్నిధ్యముద్యదరుణాయుతసోదరస్య

త్వద్విగ్రహస్య పరయా సుధయాప్లుతస్య || 2 ||

ఈశత్వనామకలుషాః కతి వా న సంతి

బ్రహ్మాదయః ప్రతిభవం ప్రలయాభిభూతాః |

ఏకః స ఏవ జనని స్థిరసిద్ధిరాస్తే

యః పాదయోస్తవ సకృత్ప్రణతిం కరోతి || 3 ||

లబ్ధ్వా సకృత్త్రిపురసుందరి తావకీనం

కారుణ్యకందలితకాంతిభరం కటాక్షం |

కందర్పకోటిసుభగాస్త్వయి భక్తిభాజః

సమ్మోహయంతి తరుణీర్భువనత్రయేఽపి || 4 ||

హ్రీంకారమేవ తవ నామ గృణంతి వేదా

మాతస్త్రికోణనిలయే త్రిపురే త్రినేత్రే |

త్వత్సంస్మృతౌ యమభటాభిభవం విహాయ

దీవ్యంతి నందనవనే సహ లోకపాలైః || 5 ||

హంతుః పురామధిగలం పరిపీయమానః

క్రూరః కథం న భవితా గరలస్య వేగః |

నాశ్వాసనాయ యది మాతరిదం తవార్ధం

దేహస్య శశ్వదమృతాప్లుతశీతలస్య || 6 ||

సర్వజ్ఞతాం సదసి వాక్పటుతాం ప్రసూతే

దేవి త్వదంఘ్రిసరసీరుహయోః ప్రణామః |

కిం చ స్ఫురన్మకుటముజ్జ్వలమాతపత్రం

ద్వే చామరే చ మహతీం వసుధాం దదాతి || 7 ||

కల్పద్రుమైరభిమతప్రతిపాదనేషు

కారుణ్యవారిధిభిరంబ భవత్కటాక్షైః |

ఆలోకయ త్రిపురసుందరి మామనాథం

త్వయ్యేవ భక్తిభరితం త్వయి బద్ధతృష్ణం || 8 ||

హంతేతరేష్వపి మనాంసి నిధాయ చాన్యే

భక్తిం వహంతి కిల పామరదైవతేషు |

త్వామేవ దేవి మనసా సమనుస్మరామి

త్వామేవ నౌమి శరణం జనని త్వమేవ || 9 ||

లక్ష్యేషు సత్స్వపి కటాక్షనిరీక్షణానా-

మాలోకయ త్రిపురసుందరి మాం కదాచిత్ |

నూనం మయా తు సదృశః కరుణైకపాత్రం

జాతో జనిష్యతి జనో న చ జాయతే వా || 10 ||

హ్రీంహ్రీమితి ప్రతిదినం జపతాం తవాఖ్యాం

కిం నామ దుర్లభమిహ త్రిపురాధివాసే |

మాలాకిరీటమదవారణమాననీయా

తాన్సేవతే వసుమతీ స్వయమేవ లక్ష్మీః || 11 ||

సంపత్కరాణి సకలేంద్రియనందనాని

సామ్రాజ్యదాననిరతాని సరోరుహాక్షి |

త్వద్వందనాని దురితాహరణోద్యతాని

మామేవ మాతరనిశం కలయంతు నాన్యం || 12 ||

కల్పోపసంహృతిషు కల్పితతాండవస్య

దేవస్య ఖండపరశోః పరభైరవస్య |

పాశాంకుశైక్షవశరాసనపుష్పబాణా

సా సాక్షిణీ విజయతే తవ మూర్తిరేకా || 13 ||

లగ్నం సదా భవతు మాతరిదం తవార్ధం

తేజః పరం బహులకుంకుమపంకశోణం |

భాస్వత్కిరీటమమృతాంశుకలావతంసం

మధ్యే త్రికోణనిలయం పరమామృతార్ద్రం || 14 ||

హ్రీంకారమేవ తవ నామ తదేవ రూపం

త్వన్నామ దుర్లభమిహ త్రిపురే గృణంతి |

త్వత్తేజసా పరిణతం వియదాదిభూతం

సౌఖ్యం తనోతి సరసీరుహసంభవాదేః || 15 ||

హ్రీంకారత్రయసంపుటేన మహతా మంత్రేణ సందీపితం

స్తోత్రం యః ప్రతివాసరం తవ పురో మాతర్జపేన్మంత్రవిత్ |

తస్య క్షోణిభుజో భవంతి వశగా లక్ష్మీశ్చిరస్థాయినీ

వాణీ నిర్మలసూక్తిభారభరితా జాగర్తి దీర్ఘం వయః || 16 ||

||కల్యాణవృష్టిస్తవః సంపూర్ణః ||