గుర్వష్టకం

 శరీరం సురూపం తథా వా కలత్రం

యశశ్చారు చిత్రం ధనం మేరుతుల్యం |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 1 ||

కలత్రం ధనం పుత్రపౌత్రాది సర్వం

గృహం బాంధవాః సర్వమేతద్ధి జాతం |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 2 ||

షడంగాదివేదో ముఖే శాస్త్రవిద్యా

కవిత్వాది గద్యం సుపద్యం కరోతి |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 3 ||

విదేశేషు మాన్యః స్వదేశేషు ధన్యః

సదాచారవృత్తేషు మత్తో న చాన్యః |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 4 ||

క్షమామండలే భూపభూపాలబృందైః

సదా సేవితం యస్య పాదారవిందం |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 5 ||

యశో మే గతం దిక్షు దానప్రతాపాత్

జగద్వస్తు సర్వం కరే యత్ప్రసాదాత్ |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 6 ||

న భోగే న యోగే న వా వాజిరాజౌ

న కాంతాముఖే నైవ విత్తేషు చిత్తం |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 7 ||

అరణ్యే న వా స్వస్య గేహే న కార్యే

న దేహే మనో వర్తతే మే త్వనర్ఘ్యే |

మనశ్చేన్న లగ్నం గురోరంఘ్రిపద్మే

తతః కిం తతః కిం తతః కిం తతః కిం || 8 ||